【長呻文，幾十年的悲鬱...】
最近睇到Ali話自己9歲開始護膚... 真係唔怪得40歲就算素顏都咁靚皮膚咁好，你話佢25歲我都信...
成日覺得，如果我會生小朋友，仔女都好，我都會由佢細細個開始就幫同教佢護膚，有時一諗起阿媽完全冇理過我，就會唔開心... 其實我細個去到中學都係一直皮膚又白又滑，我d女同學係會好羨慕同成日忍唔住摸我塊面，但當時我都有三大問題，第一係臉上有一個小疤痕，有時都知道d人望到但又唔好意思問。第二係我係毛孩，手毛腳毛密+粗+長過好多男仔，我有度過d毛係有1-1.5cm長，到中學時仲｢生鬚｣，雖然唇毛係好幼同短，但因為密同深色，都好明顯睇到好似有｢鬚｣咁，中學時成日會畀男同學笑我多毛。第三係大概中三開始，我個鼻就生咗好多黑頭，呢樣都會畀人笑士多啤梨鼻。
點解會有疤痕呢，就係細個時撞親，講緊得幾歲人仔，但我阿媽冇乜點理，傷口結疤個階段會痕我會R(我咁細個係唔會有意識阻止自己R)，我阿媽又唔理，後來我大個d時佢都有同我講去健康院畀醫生鬧佢搞到我破相，但佢次次都笑住咁講，當我知原來個疤係咁嚟時，我都唔明有咩好笑...
至於體毛問題，當然係遺傳，我阿媽都係咁，佢嗰時只會同我講話佢以前都成日畀d男仔笑，笑到佢連學都唔想返，就係咁講完就算。可能佢想表達佢明我感受，但佢唔會去搵方法幫我，只係想我接受d人係會笑，把口喺人哋度你控制唔到，就無謂唔開心咁。但其實嗰時已經有脫毛膏呢樣嘢賣，就算再low tech d，用剃刀剃都好呀，但佢唔會教你或買呢d嘢畀你。
至於黑頭，其實踏入青春期後我阿媽都冇特別話教我點護膚，我明白因為佢自己都唔識同冇呢個習慣，但其實嗰時B字頭牌子嘅黑頭鼻貼呀，磨砂膏呀，係成日賣廣告，大行其道。係，佢後生時冇呢d嘢佢唔知，但嗰時真係日日睇電視d廣告係咁loop，佢冇理由唔知，但佢都冇諗過買畀我用，但佢自己又會時不時話我個鼻做乜咁污糟... 後來有一次我同佢行萬寧，我就同佢講話呢d產品應該對黑頭有幫助，但佢望望價錢，就話呢d嘢冇用，嘥錢，都係冇買畀我。我屋企係經濟環境唔多好，但一盒鼻貼，一支磨砂膏，嗰時都係賣廿零三十蚊，但佢連買畀我試下都唔肯。嗰時我中三四係冇收入，連幫人補習都未有資格，平時除咗車錢同飯錢我亦冇額外零用錢... 咁最後我咪食少幾餐儲錢自己買...
雖然係咁，但嗰時除咗有黑頭外，我嘅皮膚狀態都仲係好好，一粒暗瘡都冇生過，點知到中六七，惡夢就開始... 嗰兩年期間係爆SARS，要戴口罩，我父母一向慳到無倫，為咗慳錢就話一個口罩可以戴一個禮拜，仲話每日返屋企除咗夾喺本書入面就ok，即係個口罩戴咗咁多日已經好污糟都唔夠，你仲要叫我夾喺本書入面噏住，你話掛出嚟吹吓曬吓，可能都仲好少少呀.. 嗰時唔似而家疫情咁，有咁多人出嚟講防疫嘢，講口罩點樣用先正確etc.，當時我又信佢哋講，因為佢哋係講到好似專家咁：｢使乜日日換架呀！可以戴好耐架，咪一樣！｣但其實根本只係佢哋想慳錢而諗出嚟嘅講法，但就講到似層層，權威咁。我想話佢哋係慳到連我哋d洗面巾、浴巾，都係用好多年先會換，基本上唔用到穿咗幾個大窿都唔會換，嗰時我條面巾係用到起晒｢孱｣，即係一濕水你會摸到條毛巾表面有一層滑孱孱嘅嘢，總之已經唔再係毛巾嘅質地... 但因為冇穿窿，佢哋係唔會畀你換新... 我後來諗返自己用條咁嘅毛巾洗面洗咗咁多年都覺得好嘔心，往後到而家我都冇再用過面巾，改咗用紙巾同潔膚棉。
就係因為佢哋為咗慳少少錢要我一個口罩戴一星期(但其實嗰時我哋唔算窮到連買口罩都買唔起，我哋住公屋啫又未係慘到住劏房瞓街嗰d，只係佢哋窮人心態，成日為咗慳幾蚊就咁樣，但慳咗嗰幾蚊又唔會有咩大改善)，我日日用個咁污糟嘅口罩噏住自己塊面，冇幾耐就開始生暗瘡，然後越生越嚴重，生到成塊面都係，由細細粒變咗做石頭瘡，一發不可收拾... 我初初都仲同自己講，爆完一輪佢會自己好，點知月復月，年復年... 到我升咗大學都一直冇好過，大學時我補5份習，因為我父母已經一蚊都冇畀我，我除咗日常使費外我仲狂儲錢想去醫暗瘡，所以我先會補5份習咁多...
嗰段時間我應該係有抑鬱症，每日都好唔想起床去刷牙時照鏡睇到自己塊爛面，除咗補習外就唔想出街，唔想返學，唔想見朋友... 我的確走咗好多堂，好多時朝早醒咗但唔想起身面對現實，就繼續瞓，有時係除咗食飯同沖涼外就全日瞓唔會離開張床，走晒全日嘅堂... 我父母都冇理，可能佢哋以為大學係咁，唔使日日返... 但我日日困喺房唔想見人，情緒低落，完全唔講嘢，佢哋可以一d都冇察覺到，又或者察覺到但不過問... 到後來有一日晏晝，我應該都係走堂所以喺屋企，佢哋煮咗麵叫我出嚟食，我先喺張床度"冷"出去，佢哋見到我真係好唔妥，終於問我咩事，佢哋一問，我就淚崩，我真係覺得好痛苦，嗰時爛咗面已經4-5年，我覺得好無助，又冇人亦冇辦法幫到我... 我喺度喊，都冇講咩，佢哋已經即刻話：｢好小事咋喎，使唔使咁慘？暗瘡會自己好架，唔會一世架，過一排會好架喇，唔使喊到咁淒涼喎｣
雖然我知佢哋想安慰我，但當我狂搵錢又使咗好多錢去用唔同方法醫，都醫唔好，已經5年，你同我佢自己會好？話冇咁淒涼？即係我小題大造？我真係無話可說... 暗瘡問題已經嚴重影響到我生活、社交、身心健康... 但佢哋覺得好小事，亦冇出手幫過我，一味叫我飲涼茶... 後來我阿媽有講，佢廿幾歲嗰時都係突然生好多暗瘡，好嚴重，話嗰時佢奶奶我阿麻都睇唔過眼，去用穿山甲煲藥畀佢飲先醫返好(我阿麻喺廣州，上面d人有方法搵到呢"野味")，我心諗，咁咪就係你奶奶都會搵方法幫你，你係我阿媽但你完全冇理過...
我用咗好多方法，洗咗好多錢(我諗加加埋埋十萬走唔甩)去醫暗瘡，前前後後起碼8年左右喇，先叫做｢好返｣，但臉上已經留下咗好多無法磨滅嘅疤痕，簡單形容就係變咗｢掹雞豆皮」。即使我後來有去做激光、膠原等醫美療程，對臉上粗大嘅毛孔、凹凸洞、暗瘡印都毫無幫助同改善... 可能做過太多激進嘅療程，我嘅皮膚已經對好多療程冇反應，我係試過打完Ultheraphy、Thermage之類高能量嘅機，都可以完全冇分別... 已經冇嘢可以幫到我。如果將我放喺醫塊面嘅錢，加埋我大學時一儲到錢即刻做晒全身激光脫毛(因為畀人笑咗太多年，咁大個女連短褲短裙都唔敢著，所以脫毛係我一有錢第一樣做嘅事，之後先暗瘡，因為我覺得激光脫毛起碼一定即刻見效先呀)，加加埋埋我諗畀到首期買樓...
我知有d嘢唔怪得父母，例如遺傳嘅嘢，佢哋都唔想，佢哋自己成長時冇資源同知識去護膚呢d，所以佢哋唔識教我幫我，明嘅。但去到我開聲求助(我真係好少會求助)，去到我抑鬱崩潰，佢哋都唔理，覺得你小題大造，完全唔關心，我就真係唔明白，同埋真係好唔開心。我知其實佢哋最大concern係錢啫，就好似我廿幾歲時，有次只係同佢哋講起我想箍牙，佢哋嘅反應係即刻面有難色，可能以為我想問佢哋攞錢，但其實我已經出咗嚟做嘢我自己有錢，何況佢哋應該知大學開始我已經一蚊都冇問佢哋攞過，我係唔會問佢哋要錢個喎！但佢哋應該好擔心錢嘅問題，之後嗰一個月，佢哋不斷同我講箍牙有幾大風險，講好多失敗例子，仲特登剪低相關剪報畀我睇，搞到我勁恐懼。講完一大輪最後同我講，如果我真係想箍，就帶我去廣州箍，話｢愛x健｣好好，又平... 我心諗，我畀你平一萬幾千又點，每個月都要嘥時間車錢來回廣州，有咩事想即刻搵個牙醫你都冇辦法即刻上到廣州喇，遠水救不了近火，而且時間保貴過金錢呀！其實就係佢哋成日覺得點樣可以慳，但到頭來根本係得不償失，而且佢哋恐嚇完我一個月之後，點解突然又覺得上廣州箍就冇風險呢？即係講到尾又係因為錢，以為我想問佢攞錢，所以為咗平d而阻止我喺香港箍... 但嗰時其實我已經打消咗箍牙嘅念頭，因為聽佢哋講咗太多恐怖失敗例子，我又去research相關嘢又再睇多d，所以驚咗，結果拖去到32歲先真係去箍，又浪費咗近十年嘅時間...
總之好多嘢佢哋就係因為錢就覺得最好唔好搞咁多嘢(但明明其實又唔係真係冇嗰舊錢，只係覺得最好可以慳返)，有病都由佢自己好，就算唔好都覺得都冇咩大不了，到而家都仲係成日標籤我係｢貪靚｣，但其實當年我面對嘅處境，已經唔係純粹因為我｢貪靚｣，嗰種毀容程度嘅狀況，由剝殼雞蛋變咗做成面都係噴晒熔岩嘅火山口，女仔嚟架，18,22本應大好年華呀，點解可以覺得冇嘢？
[ 本帖最後由 TheAcneFighter 於 2023-1-17 13:44 編輯 ]
/https://img.discuss.com.hk/d/attachments/day_230322/20230322_866e0f48c532e1cf6a7fYyMy23NGnVZT.png)
/https://img.discuss.com.hk/d/attachments/day_230321/20230321_5c9b70a71ba1ed684ad2SacDXl2OLwie.png)
/https://img.discuss.com.hk/d/attachments/day_230320/20230320_8865ef5910277949290fVkBnR10hDsls.png)
/https://img.discuss.com.hk/d/attachments/day_230317/20230317_7ed8c73828fd2e08332eWVjHYFU508Sn.png)
/https://img.discuss.com.hk/d/attachments/day_230317/20230317_22b711c719c12ddac1479LfpBgJEJXik.png)
/https://img.discuss.com.hk/d/attachments/day_230317/20230317_7fda00003a9021e6b118r2Uo0hOHMDTx.png)
/https://img.discuss.com.hk/d/attachments/day_230316/20230316_52be5619d8ead5d2f01b2bs3mk7JNzAs.png)
/https://resource02.ulifestyle.com.hk/ublog/post/w960/202303/16793924621.png)