• 瀏覽: 8,394
  • 回覆: 76
  • 分享: 1
今日係我43歲生日, 一般人應該同家人一齊慶祝。不過對我而言, 唔見呢d所謂既家人就係最好既生日禮物。


過左咁多年, 我終於有勇氣回想我都算慘既童年。我用"都算慘"去形容我既童年, 係因為我唔算係最慘既一批, 但多年來既家庭暴力同不公平待遇, 係我心中留下不能輕易解開既心結。


回想我既家庭, 第一個浮現係腦海既畫面就係, 係我5, 6歲時, 我同我媽媽坐在廚房, 佢咬牙切齒咁同我講爸爸攞左佢地買既一條金鏈貼俾大陸既親戚, 我對我爸爸仇恨既種子立刻埋下, 並成為日後家庭紛爭既源頭。


睇到呢度, 已經帶出左幾個重點: 父母關係不和, 母親利用我挑起紛爭(依度已經隱約知道媽媽既思想同做法有問題), 家境貧窮及我算係早熟。


父母關係不和, 好大程度係因為佢地盲婚啞嫁, 之後好艱難咁由大陸黎香港生活, 然後生下哥哥同我。父母無讀過書, 黎香港後只可以做基層工作, 我讀幼稚園時就已經察覺到好多野, 例如: 屋企好窮, 媽媽對好多野尤其係爸爸不滿。


回想童年, 小學開始就不斷出現家庭暴力同對我既思想及生活既負面影響。


爸爸係一個沉默寡言既人, 佢唔識點去表達自己, 相反媽媽伶牙俐齒, 係屋企, 永遠得佢講佢既歪理, 其他人一句都唔可以駁嘴, 加上我俾媽媽不停灌輸憎恨爸爸既思想, 我細個時好憎爸爸, 所以我有仇恨佢既行為。爸爸無法平和去表達自己, 結果每次佢控制唔到情緒時, 會擲爛家具電器, 又攞菜刀去砍我。


爸爸既暴力行為影響我, 媽媽則係思想及日常生活每一個細微位無時無刻影響我, 直到依家, 我有時發惡夢會夢到以前既事。



關於我媽媽, 我用幾個例子去說明佢點樣負面地影響我一生:


佢用盡方法欺負我
細個時, 有咩事阿哥同我都會一齊被打。但十幾歲後, 佢只會對我無理取鬧, 但唔會咁對阿哥。


屋企一直都只有一個厠所, 大家輪流用, 但每日佢明知我用緊厠所, 會狂踢門叫我出番黎, 俾佢去厠所。依個時候, 我即使係沖緊涼, 洗緊頭, 都要即刻離開厠所。
會唔會係我用厠所用太耐, 所以引起佢不滿呢?結果, 有一次佢又踢門叫我離開厠所, 阿哥終於忍唔住出聲鬧佢, 話佢蝦我, 明眼人都睇得出佢故意既。


唔再提供膳食
到我17, 18歲左右, 有一日, 佢突然同我講, 由聽日開始, 我唔可以再係屋企食飯, 我要賺錢養自己。當時我仲讀緊書, 但我第2日就去揾part time做, 由個一刻開始, 我三餐係外面食, 亦都無再攞過佢一亳子。



我係其他人既附屬品
細個已經感覺到, 到18歲時, 幾乎可以肯定媽媽係咁諗。


我一到18歲, 佢無通知我既情況下, 將我由當時大家一齊住既公屋上除名, 然後理直氣壯地, 要我加名落阿哥度, 幫阿哥申請2人單位既公屋。


之後佢問我可唔可以幫手假結婚, 申請大陸親戚黎香港。我當時激烈反抗, 我先唔洗假結婚。



控制慾
佢覺得佢生我, 我屬於佢, 佢認為佢有權知道我所有野, 我無權反對。例如: 佢以前會拆我所有既信, 然後扔係我床上。我好嬲, 叫我唔好拆我既信, 佢話返我轉頭: 點解我唔拆得? 


佢從來無聽過我講野
我地從來無溝通過, 我永遠記得, 細個時佢返到屋企就係鬧我地, 大左後佢作出各種攻擊性行為。我好肯定, 佢從來都唔知道我既野, 因為我唔想佢知, 俾佢知道, 只引起佢批評及不滿, 係佢眼中, 我所有野都係唔好既



[隱藏]
我二十幾歲, 經濟比較穩定時, 就即刻搬走。我走既前1個月, 佢終於知衰, 佢求我唔好走, 但我對佢地已經死心。


佢一路做既事去得太盡, 無留任何餘地。因為佢覺得佢生得我出, 佢就係太后, 佢對我點都得。


講真, 我口無叫過佢做"阿媽", 心𥚃都無當過佢係阿媽。阿媽會叫個仲讀緊書既女第2日開始就唔俾飯食加自己攪掂自己生活費? 阿媽會蝦個女, 我入厠所無3分鐘, 就踢門趕我出厠所? 



我搬走既前幾年, 經歷過報警, 我被佢打及後我入住庇護中心, 我盡最後一次努力, 去揾社工嘗試修補我地關係。


當我聽到佢講: 我無問題, 你有問題, 你自己去揾社工啦。 佢放棄左最後機會, 從此就無機會......



搬走後, 我開心左好多。起碼我過番人既生活。我唔洗驚用緊厠所時, 俾人踢門趕出厠所。我唔洗驚訓覺時俾人搖醒。我唔洗驚係上鎖既房內俾人突然開鎖......


生活變好左, 但以前既事一直都影響我。 我一直單身, 見過父母失敗既婚姻及恐怖既家庭, 我對婚姻有恐懼。
然後, 我無安全感同無自信心, 因為我以前生活係只有負面批評既世界, 無論依家有幾努力, 我仲有以前既陰影。
我覺得我呢一生都係度尋找自己, 我希望終有一日會揾到自己既人生意義。



我和妳有兩樣類似
細個洗腦同我講阿爸唔係好人 無俾家用
要我除名排公屋


老死不相往來



我41歲了,情況同你差不多。到現時為止,一想起以前父母對我做過的事就哭了。

但你比我叻好多。有能力搬出家住。我底學歷,以前無錢走。現在生活比以前好了,都打算走。

父母也是以大欺小,長輩大晒。去廁所果度,簡直一模一樣。經常無理的打駡。重男輕女,話女仔讀書晒錢,要求我唔好讀,即使要讀,也只準照顧好佢班麻雀友才可讀。我的生活一直被亞媽攪到好負面。

都可能係咁,所以感情生活也很不如意。

[ 本帖最後由 fb6fb04f11e8ca 於 2022-7-3 06:02 編輯 ]



[隱藏]
引用:
原帖由 tommwins 於 2022-7-3 01:56 發表
我和妳有兩樣類似
細個洗腦同我講阿爸唔係好人 無俾家用
要我除名排公屋


老死不相往來
父母之間關係再唔好, 都唔應該利用年幼子女去製造仇恨
細個我好憎我阿爸, 但係大左我更憎我阿媽, 而且我成日覺得佢利用我



引用:
原帖由 fb6fb04f11e8ca 於 2022-7-3 06:00 發表
我41歲了,情況同你差不多。到現時為止,一想起以前父母對我做過的事就哭了。

但你比我叻好多。有能力搬出家住。我底學歷,以前無錢走。現在生活比以前好了,都打算走。

父母也是以大欺小,長輩大晒。去廁所果度,簡直一模一樣。經常無理的打駡。重男輕女,話女仔讀書晒錢,要求我唔好讀,即使要讀,也只準照顧好佢班麻雀友才可讀。我的生活一直被亞媽攪到好負面。

都可能係咁,所以感情生活也很不如意。
搬走真係開心既, 不過真係要慳住用錢, 我最大支出就係租金。
無可能改變呢種父母既諗法, 唯有自己堅強d
我覺得自己唔識點去愛人, 從我父母既婚姻同家庭生活中, 我只睇到責罵, 埋怨, 利用人, 父母既影響真係好大



支持你的決定, 和多謝你分享過去的遭遇, 讓年青人明白, 如何面對家庭問題. 同意你是改變不了他們, 你離開家裡自己住是最好的決定.


阿哥同你關係點? 就咁睇阿哥唔係衰人


引用:
原帖由 rubberbullet 於 2022-7-3 12:02 發表
支持你的決定, 和多謝你分享過去的遭遇, 讓年青人明白, 如何面對家庭問題. 同意你是改變不了他們, 你離開家裡自己住是最好的決定.
多謝你既支持
之前同朋友講, 佢地只會講家家有本難念的經, 又話畢竟已過去, 叫我放低。我應該放唔低, 但希望對我既負面影響會越來越少



[隱藏]
引用:
原帖由 korros4 於 2022-7-3 12:19 發表
阿哥同你關係點? 就咁睇阿哥唔係衰人
無再同佢地聯絡。阿哥都利用過我, 所以我心中佢都係衰人。


之前有講過我夠18歲就落名幫阿哥申請公屋, 大約3-4年後就成功申請到, 再過幾年佢結婚生小朋友, 本來相安無事。


到我搬走前, 我特登提佢要除我名, 主因係我唔想同佢地任何人有瓜葛。公屋入住10年後, 戶籍上有既人, 即阿哥同我都要申報入息, 之後每隔幾年要申報入息。我已經協助佢申請到公屋, 而且考慮到佢當時佢已經結婚, 可以除我名, 加阿嫂同小朋友名。


我好聲好氣提佢要除我名, 我話我一定唔會去申報入息, 到時佢會好麻煩, 點知佢話唔去申請入息就得, 房署黎催就由得佢地催, 仲話有咩事佢會攪掂, 唔會煩到我。


搬走幾年後, 當時係間公屋第11定12年, 佢突然whatsapp我, 因為佢要抽居屋, 叫我去除名, 然後加阿嫂同小朋友名。


我好嬲, 仲鬧佢, 鬧完後, 佢唔敢揾我, 就叫房署職員聯絡我安排除名既事。


我一直都無後悔過鬧佢, 佢地就係咁, 無當我係人, 我個名落左係佢公屋度, 我既事黎, 我居然無權為自己做少少野。當時我算係求佢除我名時, 佢同阿嫂偷偷對望, 我feel到背後佢地有野瞞住我。到幾年後, 阿哥叫我去除名, 我就肯定阿嫂可以加名既。



鍵盤翻頁
左右
[按此隱藏 Google 建議的相符內容]