• 瀏覽: 1,131
  • 回覆: 5
[隱藏]
失戀第四日
因為唔算穩定,我冇同身邊任何人提起過呢段感情
但目前我真係需要傾訴
呢鋪真係好傷
我知道,世界仍然轉動,日子依然要過
但係,仲係好難受
明知要正常生活,但係就硬係食唔落飯,乜都唔想做,開始討厭放工放假
一靜落嚟,就會諗起佢,諗起過去兩年嘅點點滴滴
係,雖然只係短短兩年,但對我嚟講,佢係我有生以來遇見過對我最好嘅男人
我成個心交晒出去
我視佢係餘生攜手嘅另一半
為咗佢,我努力keep fit、保養、箍牙、儲錢
甚至連本身冇諗住要打嘅新冠疫苗,因為希望一正常通關就可以去見佢,我都冒險去打
點知……


係,我同佢,係異地戀
仲要一開始就異地
我哋係喺一個宜家已經冇咗嘅文字創作交流app上面,有緣相會
大家都好熱衷去寫作,仲會互相夾吓跟住落嚟嘅情節要點寫,傾多咗,發現個性志趣都好相近
當時我都冇對佢有咩特別心思或意圖,畢竟只係喺app度一齊創作同一作品嘅網友
但冇幾耐,佢就向我告白
我起初只係覺得好意外,估唔到佢會鍾意我,亦都唔係好有信心
一來,我哋識咗唔係好耐,我對佢都冇嗰種意思;二來,大家天南地北,地域距離實在太遠,如果真係要開始,大概會係一段長年持久嘅異地戀……
所以我勸佢冷靜啲,唔好俾一時嘅感覺沖昏頭腦
不過,佢仍然一直向我示好,我哋交換咗自拍照,佢仲會同我分享好多日常生活,去遊玩亦會影好多相俾我睇,我開始同佢互動多咗,慢慢地,我放低咗顧慮,答應咗佢嘅追求。
嗰陣心諗,行得幾遠係幾遠,其實認識佢一段時間,自己對佢都比較信任


佢工作時間長,身邊同事以男性為多,就算出去食飯聚會,都會主動拍片,俾我知道同咩人去,即使有異性在場都會解釋清楚對方係咩人
到大時大節,我哋會互相送禮物,佢甚至有時仲會有啲失驚無神嘅小驚喜送俾我,而佢就成日唔俾我駛錢買嘢回禮俾佢
平日每日都會聯絡,有時會打電話傾偈、視像通話
我哋會講到理想家園,約好互相去搵對方嘅會去邊度、會食啲乜,有想為對方做嘅事……


原本以為,可能到戀情結束,都唔會親身面對面見到
點知,開始戀愛一兩個月左右,機緣巧合下,佢要去離我比較近嘅地方開會培訓,我亦有假期,我哋有機會見面
仲記得當時自己嘅緊張同興奮,同時又有啲擔心
因為自知唔係咩靚女,身材一般長相平凡家底又冇乜,會怕見光死
但見面之後,佢不但冇嫌棄我,仲負責晒我所有食宿費用,食飯時不停夾餸俾我,佢仲私自逃會出嚟陪我
或者係我拍拖經驗太少(喺佢之前只拍過兩次),但係,真係從來冇任何一任男友會對我咁好……
我真係愛上咗佢
我開始奢望未來
第一次正式見面分開之後,我已經計劃下一次見面
點知突然殺出新冠疫情
每次期待假期可以見面,但又因為疫情無法成行,已經難過咗一次又一次
但係期間我哋如常每日聯絡,我更加研究緊要趁機進修,要去佢嘅城市工作
只係為咗想同佢一齊


上個月底,係我生日,佢仲送生日禮物俾我
我仲好開心……
點知轉個頭,佢就將我打入地獄
佢突然提出分手
我完全接受唔到
我唔明
一直都好地地……點解忽然就要分手?
佢對我好好,我真係好愛佢
忍咗三日,始終都係忍唔住,搵佢攤牌
結果佢先同我講,原來,佢移情別戀
識咗另一個兩個月都冇,但佢觀察自己,佢發覺自己係發自內心愛對方……

咁我算係乜嘢?
之前約定咗咁多嘢,都係過吓口癮?
聽到真相,我總算死心,我刪除咗同佢嘅聯繫
只係,情感仲未跟得上……
一路寫呢段文字,一路眼濕濕
其實我唔認為會有人認同我,甚至可能覺得係我抵死自己攞嚟
係,係我自己願賭,就應該服輸
但係,人心肉做,我真係覺得好痛
唔想再為佢有任何情緒波動……
我只係需要一個地方抒發一下……


多謝花時間睇我發嘮蘇嘅每一位
就俾我將呢段經歷放低喺呢度



熱賣及精選
今日,箍牙療程總算完成,拆得箍
牙整齊咗,應該好睇咗
本來係本住「女為悅己者容」先洗呢筆錢
但係……「悅己者」已經唔存在



順其自然,接受,勿尋求原因。勿放棄,那真正屬於你的愛情,始終會到!緣與分。


引用:
原帖由 sagas 於 2021-6-7 01:11 AM 發表

順其自然,接受,勿尋求原因。勿放棄,那真正屬於你的愛情,始終會到!緣與分。
多謝你,不過,暫時都唔想再拍拖住…
一個全心信任嘅人,突然話變就變,
雖然可能係Long D影響,
不過我對戀愛真係冇乜信心……



[隱藏]
去玩散心


引用:
原帖由 傻瓜貓奴 於 2021-6-6 11:19 AM 發表

失戀第四日
因為唔算穩定,我冇同身邊任何人提起過呢段感情
但目前我真係需要傾訴
呢鋪真係好傷
我知道,世界仍然轉動,日子依然要過
但係,仲係好難受
明知要正常生活,但係就硬係食唔落飯,乜都唔想做,開始討厭放工放假
一靜落嚟,就會諗起佢,諗起過去兩年嘅點點滴滴
係,雖然只係短短兩年,但對我嚟講,佢係我有生以來遇見過對我最好嘅男人
我成個心交晒出去
我視佢係餘生攜手嘅另一半
為咗 ...
希望你可以從傷痛走出來!
Long d 中間有好多elements影響到件事,有時真係要應天命!
倒轉件事去睇,努力keep fit, 保養,箍牙,儲錢至打針,其實都係為自己做更好嘅準備!
由6月6日失戀第四天至今已經好多日,如果你未起到身的話,今日對著塊鏡同鏡中人講,俾個期限自己,要從新起起步!



[按此隱藏 Google 建議的相符內容]