大家信唔信網戀？唔知有冇進一步發展空間！(長文慎入)
#1
發表於 2021-2-28 10:47 PM
[按此打開]
[隱藏]
有d長，希望大家唔好介意同比d意見我。
最近係網到識左個男仔，大我5年，佢係香港人但係外國長大，唔識中文/廣東話，我地傾偈都係用英文。
初初都好愕然，我本身唔識佢，佢冇啦啦add我同我傾偈話想識個朋友，我本身都有d抗拒，之後佢都善意咁話想識個朋友傾偈，我就話傾偈可以，但唔可以add我d朋友騷擾佢地咁，但我之後都del左佢唔比佢follow我。
初初我地IG到傾偈，之後就轉左用其他通訊軟件傾，日日都有傾偈，多數都係佢主動問我嘢，問一句我先答一句咁，傾左一星期左右，都係問下興趣咁，而又冇乜甜言蜜語嘅說話，多數都係傾一d理性嘅問題，問下對方意見咁，feel到係冇惡意嘅對答，所以都有繼續傾落去，不過因為時差嘅問題，佢起身我就差唔多瞓覺，所以傾嘅時間都唔係好多，不過到宜家傾左兩個星期左右，我覺得對話開始有d曖昧，有一日佢同我傾左3個鐘，而佢個邊已經係凌晨三點幾，我唔知係咪關佢係外國大嘅關係定點，佢日日都會同我講早晨同晚安，就算有時差，佢都會睇啱香港時間同我講早晨同晚安同問我今日過成點，而佢有時會叫我dear/honey, 我都冇乜嘢，當係鬼仔性格咁看待，每日同佢傾偈嘅時候都係舒服嘅，feel到係冇惡意，不過我feel到佢唔只淨係想停留係做朋友嘅關係，傾偈個陣，佢間中會有一兩句口花花嘅說話，但我又覺得無傷大雅但又冇直接覆佢咁，而佢有時講嘢係嘅sweet，如果佢知我夜晚同朋友食飯，會問我有冇人送我返屋企或者唔好咁夜返，返到去話佢知咁。而大家都有互send相比大家睇，到宜家都keep住有同佢傾偈。
我同朋友講呢件事，佢地都話可以繼續keep住傾，但有唔對路就要停，而我自己都係咁諗。雖然到宜家傾偈嘅狀況係舒服嘅，但我自己又唔想係網上識左人冇耐就有進一步發展，同埋始終對大家都唔係好熟悉，冇見過面淨係靠傳訊息傾偈，我自己始終都有保留，所以有時佢對我講一d曖昧嘅說話我都冇直接答佢咁，不過有一日佢太忙淨係同我傾左一兩句就好夜先再覆機而有少少唔開心嘅感覺。但我又有諗過佢可以咁樣搵我傾偈，亦都可以同第二個咁樣傾，我亦都有問過佢同樣嘅問題，佢就冇迫我想快d有進一步發展，佢都話用時間溝通好重要，雖然佢同我傾偈我都唔會秒覆佢，但有時睇到佢搵我傾偈，又會有d開心咁，而宜家呢個狀況我驚我會習慣成自然，到真係唔再有聯絡嘅時候會受傷害。
想問下大家信唔信網戀？又或者覺得網戀會唔會成功？
大家覺得我應唔應該繼續日日同佢傾偈？
又或者會唔會有發展空間呢？
