過來人，結婚呢家嘢好易傷朋友感情，五年前我朋友結婚但我喺外國流浪，本身係趕得切喺佢結婚前返嚟，但因為決定延長行程，咁佢個婚禮就卡住喺我整個行程嘅中間，而我係花唔起成萬蚊來回機票特登返嚟出席佢個婚禮(仲要只係觀禮因為佢冇擺酒)，但我都唔係臨時飛起佢，我喺佢結婚前4個月已經同咗佢講，但佢始終都係覺得我當初講過我會趕返嚟但最後唔返就係我唔守承諾，但喺我角度睇就係佢冇體諒同尊重我嘅選擇，佢覺得我應該將佢嘅人生大事放喺我嘅人生大事之上(我儲咗十年錢，裸辭，掉低經營咗5年嘅事業再掉低拍咗5年拖嘅男友都要去流浪，因為真係我畢生最大夢想...)
但之後就一直畀佢講咗笑咗五年，佢把口話唔介意，話只係隨口up笑吓我唔守承諾，但其實唔介意就唔會講咁多年都仲講，佢自己都認佢係"笑我"，即係佢唔係唔知佢講嘅嘢個intention係令想我難受同埋令我喺其他人面前出醜.. 我本身覺得當係我理虧在先，佢可以嬲我話我笑我(一兩年好了吧？), 但佢係唔會停，佢講到第5年時我就知佢會記一世講一世，其實咁就變咗怨婦，變得好討厭，再加埋其他佢對我得勢不饒人嘅行為同說話(都有可能係源自佢對我冇出席佢婚禮的怨懟) ，踐踏咗同埋已經遠遠超越我嘅底線，我最後同佢反咗面。
