• 瀏覽: 2,043
  • 回覆: 5
  • 追帖: 2
[隱藏]
已經係兩個小朋友的媽媽了,細女已經出咗世三個星期啦,想喺度分享一下第一胎係廣華醫院生同第二胎係瑪麗醫院生的經歷。
生第一胎嗰時係2017年,嗰時喺廣華醫院係超級爆多人基本上所有床位都係滿曬,醫護人員好似唔多足夠,因為我記得嗰時入左床位後就冇人再理過我。嗰時生第一胎我係因為早上七點穿水然後入醫院,係登記嗰時我有同護士講我已經穿咗水,但佢比我嘅反應係:「呢個係你自己話穿水唔係我哋話。」然後比衫我換再帶我去床位安置。
除咗頭半個鐘測心跳之外,8-11點冇人再理過我,然後到食飯時間,護士叫我唔好食住等見埋醫生先。期間我行過去護士站問想換塊墊,因為我穿左水已經浸濕曬,個時個護士先mark翻低我係穿左水(心念:點解一開頭唔信我)
食飯時間過左都未有醫生黎睇我,我由12點開始就覺得好痛,痛到要穩嘢捉著,痛到已經食唔落嘢,但因為第一次生所以唔知幾痛先叫生得。
跟住到2點,醫生終於帶住一班實習學生黎見我(6.7個左右),唔知係咪太多人的關係無拉簾的情況下就做檢查... 一打開件衫就話,已經見到頭仔,即刻連床帶人推左入產房。大約15-20分鐘左右就生左出黎。

如果當時個醫生再遲多小小黎,我會唔會已經自己生左呢

(俾D時間我再打埋瑪麗醫院)



回覆 引用 TOP

第二胎係2020年10月生,因為搬左屋所以就係瑪麗醫院生。唔知係咪武漢肺炎問題,好似真係唔係好多媽媽。(南亞裔仲多過本地人)
第二胎係有做過人手推肚(因胎位不正),如果有興趣想知多D,可以話我知我再開post講。
入院已經係40+6,有陣痛有見紅。有第一胎的經驗好多嘢都得心應手。入到去都係做例行驗小便量血壓測胎心等,完成後再轉一個床位俾你,因為個度會比較靜D同埋可以用手機。醫護人員係會感覺非常充足,差不多每1小時就會有人黎關心一下你,同埋會話俾你知有D咩感覺時就要話俾護士知,指示好清晰。
因爲我有左之後血壓較高同埋血色素都偏低,所以距地有幫我抽血驗,同埋做好配血準備。(呢一刻我覺得真係好專業,因為我第一胎都有呢個問題,但無做過呢D動作)
因為有經驗,去到一定的痛感同埋強烈的下墜感時,我知道我要生了。一過左陣痛即刻行去護士站度,然後幫我做指探,第一次做!好神奇的感覺,距伸左只手入去我竟然唔覺得痛,然後距話我知已經開3指,可以轉去產房。(原來開始痛到2分鐘左右一次就係開3指)
入到產房後,我眼見係有4位助產士係度(當時廣華醫院只得1個),然後有一位醫生幫種豆,因為血壓問題有機會會掉鹽水。助產士係會教你點用力,幾時休息,同埋教你笑氣點用(係第一次接觸笑氣)。一開始係駁機觀測胎心同埋我的血壓,大概半個鐘時間我由3指去到5指,然後穿左水露左BB頭出黎。開始要生時,有1位助產士係隔離教你幾時要用力幾時要呼氣,2位助產士做接生。我個時係咁吸笑氣,我覺得係無減痛作用,而係個人好似有D升仙嘎感覺,聽人講嘢會慢兩part反應。
大約10-15分鐘就順利出左世,護士仲問我要吾要剪臍帶。
總括黎講,我覺得瑪麗的人手係充足,有耐性同有愛心。
題外話,見台灣好多人都有做熱蠟除毛,第二胎都做左私密處脫毛,生完後同坐月個時清潔真係好方便!



回覆 引用 TOP

同意, 我兩胎都係QM 生, 零負評, 無野係唔好, 我住半私家房, 真係感覺係私家醫院生一樣


回覆 引用 TOP

我兩年前喺QE生,l簡直係從地獄走出來,第二胎即刻去私家唔使諗


[隱藏]
上年QE生,產檢都係QE,感覺良好
零負評
住半私家病房



回覆 引用 TOP

引用:
原帖由 沉睡義蝦仁 於 2020-11-1 05:52 AM 發表

我兩年前喺QE生,l簡直係從地獄走出來,第二胎即刻去私家唔使諗
點解呢?感覺醫護人員同設備都係最好,我自己對比



回覆 引用 TOP

[按此隱藏 Google 建議的相符內容]