[按此打開]
[隱藏]
啲人成日話孻仔/孻女孻心肝，係我身上完全睇唔到呢回事。屋企人每次一講「你出世個陣好好環境，成屋人最錫你」真係難聽過粗口，隔夜飯都嘔出黎。
阿爸阿媽重男輕女，對我哥完全縱容，亦好錫我家姐，唯獨就係唔錫我。
細細個開始，我就覺得自己係灰姑娘，小一自己返學放學，小四開始要煮飯，做哂全屋家務，自己一個去百佳託柴米油鹽。而佢地呢，老豆賭馬，阿媽日煲夜煲電話粥，阿哥關房門打機，家姐就中意挑釁是非聊交嗌/搵位打我。我好記得幼年時期，我姐睇完少女漫畫就迫我摸佢、同佢打茄輪，當時我小學一年級。大個啲之後就動輒對我拳打腳踢，再大個啲唔夠我打，就出返口術，係阿媽面前屈9我，而每一次我媽都係會鬧我係做錯果個。
因為哥姐讀書永遠高年班過我，話學業忙（但會考0分），到出黎做野，話返工攰，所以咩都推哂比我呢個最細嘅去做。
阿爸阿媽成日每日一少吵三日一大吵，有時仲會打交，之後我媽就會打我黎出氣，好記得好記得一次佢打完我之後同我講左句「哇依家條氣順哂，岩岩真係chok住chok住」。每一次既委屈，我都要躲去廁所扮痾屎先可以喊出黎。因為有一次我喊，第二日條金魚死左，我媽屌我話因為我喊搞到拖衰哂成間屋（佢係極度迷信）。
仲好記得SARS嗰一年，我染上肺炎發高燒發左成個星期，攤係床上病到迷迷糊糊，床都落唔到嘅時候，只聽到阿媽係一直隔離煲電話粥，直到第四、五日先帶我去睇醫生，途中不停鬧我話我唔做屋企野，唔聽話亂食野搞到自己病乜乜柒柒。
最難受嘅唔係呢啲經歷，而係成長路程中同身邊同輩嘅強烈對比落差。人地個個都有父幹母幹，即使窮也窮得一家融洽。係呢個精英社會，唔會有人願意花時間去了解、亦唔會明白、亦唔會睇得起你咁嘅背景，除非until一日你出人頭地名成利就，好似李嘉誠咁細說當年。
就咁樣係幾乎每晚以淚洗面情況下渡過左我既童年。到左出黎做野，先真正有機會有藉口一個月一兩次去夜街同朋友食下晚飯，以為出黎做野待遇會好啲，原來惡夢仲未完結，只係一個阿四新增左搖錢樹技能。
我哥到成家立室之齡，咁多年仲係單身一事無成，老豆比壓力佢既時候，佢竟然講得出「無樓咪無女朋友囉」，我媽又做得出，即刻用咁多年積蓄買左層舊樓比我哥，佢搬左出去住半年，照顧唔掂自己又搬返同阿爸阿媽住，同埋嫌層舊樓唔見得人。
我媽同我講「媽咪依家無哂錢喇 你要比多啲家用」，佢要求我每月比7000，但我哥連供樓連帶飯一日三餐帶食屋企都只係比5000。原來能力小就責任小，咁我咁辛苦打幾份工做乜？我一怒之下，就決定自己搬出去住，我寧願無錢儲，換來自由同受少啲氣。
反觀我家姐，有兩聲咳就即刻有得睇醫生，返工一個月病兩次，我媽就話肯定係公司風水唔好，叫佢辭職唔好做，結果我姐以25歲之齡就畢業社會大學。
經我媽介紹下，佢嫁得出，生左兩個小朋友。但係因為自細從來五指不沾陽春水，家務搞唔掂，湊仔湊唔掂，時間管理一塌糊塗。
幾年間，日頭就擺兩個細路去我媽度，我媽煮埋午飯，先後湊兩個放學。而佢自己就送完返學，訓到1pm起身，去我媽度食lunch，食完返房訓晏覺訓到4pm，訓醒終日禁手機唔理兩個細路，我搬出去之前都係我睇佢地功課。但佢依然會不斷聊是鬥非，成日同我媽講話我做乜唔比多啲家用，做乜仲有閒錢去旅行，做乜唔返娘家幫手做家務。
最大問題係我姐嘅公主癌，好高騖遠，好吃懶做，自己唔工作唔吃苦但又想做大花筒。成日想走捷徑，早幾年佢話要買樓收租，問我阿爸阿媽借錢比首期，結果我姐夫要供兩層樓，養一大兩細，收工仲要煮晚飯，有時仲特登拎假做家務，本身讀緊master中途都要輟學。
但佢仲唔心足，成日怨自己老公窮，無時間陪佢，又妒忌其他媽媽有錢有學識，搞到自己同比其他媽媽谷杯葛。為左想令自己似個上流人，洗多錢買好多化妝品，買美容package，有幾次我仲收到啲迎新訊息，比我發現原來佢擅自用左我個人資料去貪啲新客戶優惠。
無自知之明，唔自省、唔心足又唔感恩既循環下，一個半退休嘅家庭主婦諷刺地谷到思覺失調，成日會掉低兩個年幼仔女走左去，係社交媒體做出啲匪夷所思嘅言行，本來要供樓嘅錢、兩個細路嘅學費，都拎左去瘋狂購物。每次姐夫叫佢睇醫生都會發哂癲鬧交收場。最陰公係兩個得幾歲嘅小朋友要親歷哂呢啲不知所謂。
終於有一次有幻覺話比人綁架，自己報警之後比人拉左送去睇精神科，醫生話要住院一個月觀察，但第二日我阿爸阿媽就接左佢出院，話返屋企拜多啲神裝多啲香就會好返。真係生仔要考牌，ignorance is a sin。
之後我阿媽繼續時不時出口術，話「阿咩太之前問我，丫你個女搵咁多錢，每個月有無比到一萬蚊你呀？我唔敢出聲呀，我咪話有囉」「你有無加人工呀，幾時加人工呀」「你唔夠錢洗今個月咪比少啲囉，我無所謂架」「媽咪無錢呀 之前借左30萬比家姐...」
呢一下我又發現新大陸，原來我家姐借左屋企30萬，到依家一個仙都無還過，而阿爸阿媽亦都無追過，話佢手緊就慢慢黎啦。兩老不斷貨金比兩個大嘅，而我份糧供得起，但一個仙都唔肯借比我。
細個無條件無環境無心機讀書，無學歷，由一開始出黎做野得10k人工，之後同時打幾份工，日頭做文員，夜晚同小學生補習，週末做散工，收入16k。到自己搬出黎住，收入20k，月租10k，用埋剩低嘅錢半工讀讀左part time degree，努力幸獲成果，一步步升職，人工翻倍，仲識到個好錫我嘅老公。
事實證明，遠離左垃圾人，改變身心靈嘅自主程度係大大提高左，自然先會更有空間去實現自己嘅目標，心情開朗左，好事自然會黎。雖然依家仲會三日唔埋兩日被家事困擾，每一個message/電話啲仆街內容都令到我情緒低落。但我都好感恩，呢啲經歷令我成為呢個垃圾家庭中最有成績既一個人。
我自問自己係一個好注重、好嚮往家庭嘅人，但係每次衷心對佢地好嘅時候，呢個家庭都never fails to disappoint me。如今掉低佢地心情如仇人，係咪好不孝？我只覺得，以德報怨，何以報德？
