[按此打開]
[隱藏]
我第一次喺度發文，有啲嘢點都想同人傾吓，其實我由細到大都好自卑，有可能同家庭嘅影響有關，細個嘅時候爹哋媽咪特別鍾意講特別難聽嘅嘢同打人，社工為咗隔開我哋，我18歲成年嗰一刻即刻搬咗出嚟住，其實果一刻我仲未ready好，突然去咗一個每日先得自己一個人住嘅地方，好驚好無助，大約一兩年後我開始習慣咗。
等我長大咗之後，我明顯感覺到爹哋媽咪嘅態度好轉咗好多，好似對我感到有啲內疚（從姐姐口中得知，佢哋冇親口同我講）關於自己一個人住呢樣嘢其實我唔係幾敢喺人哋面前講，因為我覺得係呢種歲數嘅人唔係都同屋企人一齊住咩？人哋會唔會覺得我奇怪？
然後仲有樣嘢令我好自卑，我原本係讀一間Band one嘅中學，但係由from 2開始屋企人嘅爭執越來越嚴重，係差唔多日日都會俾人打鬧嗰種，仲曾經兩次俾媽咪趕去關愛之家嗰種地方住，對我造成好大嘅心理陰影。
爹哋媽咪嗰時候打人鬧人比較似係搵人發洩嗰種，可能1家6口佢哋生活壓力大掛，爸爸媽咪之間成日嘈交，有時候媽咪俾爸爸鬧都頂唔順會攞我黎出氣，當時我唔明白自己做錯咗啲乜嘢會俾人拋棄。
細個啲嘢我而家唔係幾想去回憶啦，諗多咗都冇用只係會令自己唔開心，而且而家爹哋媽咪對我嘅態度好轉咪好囉，呢一樣嘢我其實好開心。
但係仲係有樣嘢仍然令我好自卑，from 2嗰年因為喺學校讀書有啲唔適應加上屋企爭執嘅影響，我成績開始追唔上，留班左兩年，加上我比其他人遲一年入小學，總共比人哋大三歲，每次同學問我嘅年齡嘅時候我都好尷尬，驚人哋覺得我好奇怪。
我原本係個好安靜嘅人，安靜到有啲孤僻，有時候喺學校甚至可以好耐都唔講一句嘢，盡量唔表現自己，當我出咗嚟住之後我變得越來越自卑，而且嗰一年因為我留班左太多次就轉校，因為由女校轉去男女校，加上我原本好怕羞，好唔適應，之後甚至驚到唔敢返去學校，甚至惡化都唔敢出街，就咁樣持續左一年多，之前間唔中家姐都會帶我去出街，但係我莫名其妙對學校有份恐懼，唔係幾敢返去學校，成日驚俾人笑同睇唔起我。
以上就係我嘅經歷，如果你身邊有個咁樣嘅人，唔知道你哋會唔會歧視或者睇唔起佢呢？
呢樣嘢為我帶來好大嘅困擾，我太在意人哋嘅眼光，成日覺得人哋覺得我奇怪，跟住我乜嘢都唔敢做。
[ 本帖最後由 深海少女 於 2020-9-14 01:31 PM 編輯 ]
