[按此打開]
[隱藏]
真系好厭惡我媽。日日就嘈嘈閉。乜都鬧一餐，乜都又關佢事。已經唔想同佢講嘢。佢一行過黎，已經心入面無名火起。佢講想我幫佢做啲嘢，我就會想返以前發生嘅事，會唔好老脾。佢就話我，仲乜發癲。哈，佢自己每時每刻發脾氣就得。人地就唔得。話我有乜事就講出黎。講過啦，佢有聽咩。以前同佢講想做啲乜，佢一定話唔好/唔得。尤其系要出街會煩到佢搵衫褲俾我嘅就唔得，唔想我去。佢系一個有控制慾同潔癖嘅人。乜都管住曬，連衫褲都要管。
有個細舅父，同佢差10幾年嘅。所以舅父兩個女都系細我10幾年。舅父俾女學嘢（彈琴，游水，溜冰）同補習。佢就話人地對個女金雕玉砌。依家人地大個左，又叻又多見識。反而我就高不成，低不就。佢仲埋怨我地（我同我細佬）冇俾好生活佢。佢乜都冇俾我地學呀。連基本如游水，踩單車都唔識。搞到啲朋輩覺得我好廢，乜都唔識。仲好意思話有栽培我。考大學時，要考個英文試。我話想補習都俾唔到我。要我自己死掂。以前鬧交，我話屋企經濟唔好，佢唔認。依家講返以前冇俾乜我時，又話根本冇錢。都唔知邊句先真。
成日活系自己嘅年代，覺得我地讀完書就會有好工。我地讀大學時，已經話要有人生經驗，唔好只系死讀書。啲僱主覺得你只系得讀書，冇做其他嘢連啲課外活動都冇，就唔想請。個時已經同佢講無論做part time 定義工都好呀。佢就唔信，唔俾我地做讀書以外嘅嘢。搞到我地畢業後幾辛苦先搵到工。
佢有用心聽過我地想點咩，有關心過咩。只系顧自己嘅開心同喜好。唔中意，就唔俾，唔會顧下系咪仔女想要。話有栽培我，咪就系基本讀書咁大把。唔俾就犯法咋。要我地讀大學就系滿足佢嘅虛榮心。我地都系借政府錢，自己還。人地唔知，以為佢真系擺左好多心血系我身上。佢根本就想用最低嘅成本得到更多。
