註冊 登入



打印

我老爺遺囑繼承人寫佢個女嘅名。

我老爺遺囑繼承人寫佢個女嘅名。 E-mail 此主題給朋友

[隱藏]
我對佢哋好唔係為佢哋層樓,係為我老公,我從來不求回報,所以過去8年我老公供樓嘅錢我亦都冇諗住追回,我依家係想為自己打算,想斷供同老公一齊儲錢買自己樓!你哋睇頭唔睇尾就亂咁評價他人想貪財產。
未來我對佢哋好唔好都同佢層樓無關。父母偏心係人都會唔開心,我講出心裡不滿唔等於要逼佢哋寫我名。由頭到尾我都冇話要求寫我名,我從來冇奢望過。
兩個人結婚後會有共同存款,我哋冇儲蓄,我諗香港冇一對夫妻會冇儲蓄,除非佢哋係樓奴,30幾歲,我都會擔心將來,將來唔一定會訓街,但卻要睇他人面色過活,一個唔好彩有人病咗,我唔想做束手無策企佢哋身邊哭果個人。我諗做父母嘅都唔希望自己個女要睇他人面色過活。
如果咁嘅要求係過分,我真係懷疑自己身在古代,女人命運掌握在夫家。
我唔係怨婦,亦都可以接受離婚,當年為愛不顧一切,今日都會為美好未來不顧一切,因為香港女仔唔需要依附任何人都可以過得好好,我嫁人係為過更好日子,我相信呢個係每一對夫妻結婚時嘅願望,哪怕努力過依然買唔起樓,我都希望多少有啲錢旁身,不為自己都要為家人。唔通有人會期望自己有病時夫家會賣樓救自己或自己屋企人?
我自問我做得好過好多新抱,甚至好多時會俾人覺得我係表演,我唔care佢哋點評價係因為我問心無愧,但屈我貪財果啲,我跪求你哋為自己兒女積口德啦,因果循環,收口啦唔該!














今日幫我奶奶執房,因為佢好混亂,成日搞到間房好亂,我擅長整理,所以提議幫佢執下,奶奶話OK唔該晒,咁我就開始執嘢。
整理文件雜物時見到有遺囑兩個字,心諗原來老爺奶奶有心已經安排好身後事,就掃咗一眼,睇到老公妹妹個名,好好奇佢點寫,所以攞起睇(其實睇之前我唔介意佢點寫,因為我覺得佢哋得一仔一女,平時對我又冇乜意見,係結婚前老爺好唔鍾意我,覺得我襯唔起我老公,但我心諗佢哋都會公平對仔女,且咁多年來相安無事,所以唔care佢哋點寫,又好奇心作怪。
結果睇到繼承人淨係寫老公妹妹個名,我突然間好唔開心,因為見到遺囑係我結婚前2個月寫嘅,有晒簽名、公證。但層樓我老爺俾咗200幾萬首期後,呢8年以來都係我老公供緊,萬幾+管理費水電煤,一個月2萬幾。
我同老公講我睇咗遺囑嘅事,我老公話,事實上首期係我老爺俾嘅,戶名都係我老爺,應該由我老爺支配,我哋出去租屋住都要俾月租,就當我哋租屋住罷了。
雖然係咁講,但我唔甘心,其一,老公妹妹嫁咗去英國,一年返唔到一次,照顧父母佢根本有心無力。其二,前年因為老爺奶奶身體唔好,需要成日去醫院複診同去社區日間中心上培訓課程,老公同佢妹妹商量後,建議我辭咗份工全職照顧老爺奶奶,因為我人工最低,所以我就辭咗工,成日煮好嘢俾佢哋食,一年帶佢哋去幾次大陸旅行,自己唔願意駛錢,但好捨得為佢哋駛錢。
我覺得佢哋好假,原來起我結婚前已經寫好遺囑,且我老公一早知,我唔係一定要呢層樓,但我覺得好委屈。覺得咁多年全心全意付出原來人哋當我係賊。我甚至想同我老公講我哋搬出去住,但唔想佢覺得我因為呢件事而想搬走,我直覺上覺得佢唔會同意我嘅建議,但我真係唔想再為佢哋付出。
我覺得我同我老公會因為呢個問題離婚,因為佢係孝子,而我想逃離呢個家庭。
我哋冇小朋友,因為覺得養唔起,生活壓力太大,老爺奶奶冇退休金,每個月得果千零蚊生果金,又成日睇病食藥,又要過人上人生活一個禮拜去幾次酒樓飲茶、食飯,而我成日覺得佢哋年紀大,可以孝順一日得一日,希望佢哋開開心心安度晚年,所以雖然每個月做月光一族都好樂意。
老公妹妹有個仔,老爺奶奶好鍾意,成日同人哋講都話:我個孫點點點,我個孫點點點。佢哋係想層樓留俾個外孫。
唔知佢哋有冇諗過佢哋百年之後層樓俾咗個孫我哋兩夫妻住邊呢?

[ 本帖最後由 急焦清涼的主角 於 2019-5-22 09:00 PM 編輯 ]



咁都得?講你老公?


回覆 引用 TOP

厚多士。😆😆😆😆😆😆


回覆 引用 TOP

好仔不論爺田地,你老公都唔介意!樓主你介意咩?講真,d 錢係你老爺的,佢鐘意比邊個都可以,樓主無權唔開心


[隱藏]
爭氣啲,同老公搬出去!

自己儲首期,佢哋百年歸老後,你哋都有自己嘅物業, 唔好諗住靠老爺奶奶留畀你哋!!!



講咁多 味又係為左距份身家
唔洗扮冇了



佢有權決定遺產的分配


引用:
原帖由 iLove_穎兒 於 2019-5-21 08:07 AM 發表

好仔不論爺田地,你老公都唔介意!樓主你介意咩?講真,d 錢係你老爺的,佢鐘意比邊個都可以,樓主無權唔開心
你又唔諗下人地處境,個妹又冇照顧個爸,個新抱放棄份工執頭執尾,只有有付出冇回報。
仲有,樓主老公可能係物業借款人或擔保人,要另外供自己層樓,銀行見佢供緊另一層好大機會唔借



引用:
原帖由 iLove_穎兒 於 2019-5-21 08:07 AM 發表

好仔不論爺田地,你老公都唔介意!樓主你介意咩?講真,d 錢係你老爺的,佢鐘意比邊個都可以,樓主無權唔開心
講真,生在HK,我唔信冇人介意呢啲事,我結婚係組成一個新家庭,我同我老公悭悭哋,出去自己租屋住呢8年以來我哋足夠俾首期上車,而唔係為咗兩老每個月做月光一族,心諗有屋住已足夠,但發現原來你將全部身家放起層樓度,而層樓將來唔屬於你,咁我想知係咪你都會唔介意?未雨綢繆,係人都會為自己未來打算,結婚前我已經知道層樓係我老爺名,我唔介意同佢哋住,唔介意老公每個月供樓,我覺得呢個家係我哋嘅,就算將來同妹妹一人一半,起碼我哋可以有錢在身,再難啲我哋可以俾個首期慢慢供,而不致於將來我哋一無所有。事實上我哋依家都係一無所有,我唔知這些年以來為咗乜,呢個唔係我結婚嘅初衷,我結婚前有少少積蓄,我可以過得好開心,我結婚後,依家都2年冇返工,全家靠老公生活,就為咗成全佢做孝子,但我覺得好唔值,我唔想咁偉大。
大家覺得我就係為咗層樓,事實上我可以唔要,但我想開始我嘅新生活,請個工人俾兩老,不再幫佢哋供樓,我會勤力工作,買居屋一定冇問題。如果咁都叫貪,我唔知人生為乜。



[隱藏]
引用:
原帖由 急焦清涼的主角 於 2019-5-21 03:29 AM 發表


..............整理文件雜物時見到有遺囑兩個字.......
呢個結果, 由一連串判斷失誤, 沒掌握形勢和唔知自己想乜要乜而造成

1.  我唔介意佢點寫,因為我覺得佢哋得一仔一女,平時對我又冇乜意見
............明明介意

2. 我心諗佢哋都會公平對仔女
.........你是局外人, 錯判

3. 事實上首期係我老爺俾嘅,戶名都係我老爺,應該由我老爺支配, 老爺俾咗200幾萬首期後,呢8年以來都係我老公供緊,萬幾+管理費水電煤,一個月2萬幾
.........這是你老公和老爺的安排, 你信老公, 仲有什麼好講?

4. 因為我人工最低,所以我就辭咗工
..........錯判

5. 我成日覺得佢哋年紀大,可以孝順一日得一日,希望佢哋開開心心安度晚年,所以雖然每個月做月光一族都好樂意, 但我真係唔想再為佢哋付出
..........在付出和回報間, 錯判

6. 成日同人哋講都話:我個孫點點點,我個孫點點點。佢哋係想層樓留俾個外孫
..........老人家從來都坦白表明佢對你的態度, 只是你一廂情願以為有能力扭轉局面, 錯判

不如冷靜D, 想清楚自己想要什麼, 有能力爭取什麼

你無生產能力, 即經濟收入和子嗣,  完全無籌碼在呢個家庭bargain, 要再加把勁才成



唔洗唔開心,既然層樓無打算留比你地,你立即搵返份工搬啦,叫你老爺租層樓出去比人2 老租間細啲遠啲住又好,安老按揭又好,唔洗理呢度啲人講野,人總要為自己打算


引用:
原帖由 401 於 2019-5-21 09:57 AM 發表




呢個結果, 由一連串判斷失誤, 沒掌握形勢和唔知自己想乜要乜而造成

1.  我唔介意佢點寫,因為我覺得佢哋得一仔一女,平時對我又冇乜意見
............明明介意

2. 我心諗佢哋都會公平對仔女
.........你是局外人, 錯判

3. 事實上首期係我老爺俾嘅,戶名都係我老爺,應該由我老爺支配, 老爺俾咗200幾萬首期後,呢8年以來都 ...
最有效籌碼就係離婚!一申請離婚,交代整個問題,個法官好大機會將老爺層樓某個百分比業權視為老公財產一部分,而強制將老爺業權分割畀個前新抱



引用:
原帖由 凍靚茶 於 2019-5-21 10:00 AM 發表

唔洗唔開心,既然層樓無打算留比你地,你立即搵返份工搬啦,叫你老爺租層樓出去比人2 老租間細啲遠啲住又好,安老按揭又好,唔洗理呢度啲人講野,人總要為自己打算 ...
有個現成嘅中傭,佢哋點會捨得離開自己間屋啊?尤其是仔女想攞我黎做孝子孝女,無啦啦個仔要自己住,無啦啦要出去租屋住,我諗冇人肯咁做咯。就算我講明想自己儲錢買樓佢哋都會話有屋住點解要買樓?我冇理由話:係呀,我想要你層樓,依家我知道你層樓寫咗俾個孫,我哋要為自己將來打算,唔理你啦。
全家當我係中傭,我諗都係離婚最直接,唔想為愛犧牲太多。



引用:
原帖由 急焦清涼的主角 於 2019-5-21 09:42 AM 發表


講真,生在HK,我唔信冇人介意呢啲事,我結婚係組成一個新家庭,我同我老公悭悭哋,出去自己租屋住呢8年以來我哋足夠俾首期上車,而唔係為咗兩老每個月做月光一族,心諗有屋住已足夠,但發現原來你將全部身家放起層樓度,而層樓將來唔屬於你,咁我想知係咪你都會唔介意?未雨綢繆,係人都會為自己未來打算,結婚前我已經知道層樓係我老爺名,我唔介意同佢哋住,唔介意老公每個月供樓,我覺得呢個家係我哋嘅,就算將來同妹妹一 ...
同意樓主... 你都要為自己打算, 香港愈來愈難生存,由其是無層樓,到時你老爺奶奶死左,個妹賣樓,你訓街咩,早早作個打算啦,同老爺奶奶傾都無謂,只會招人口實,快D出去搵工,儲番D私己錢



[隱藏]
引用:
原帖由 kelvinlovekaren 於 2019-5-21 10:10 AM 發表


最有效籌碼就係離婚!一申請離婚,交代整個問題,個法官好大機會將老爺層樓某個百分比業權視為老公財產一部分,而強制將老爺業權分割畀個前新抱 ...
九唔搭八



 提示:支持鍵盤翻頁 ←左 右→




重要聲明:本討論區是以即時上載留言的方式運作,香港討論區對所有留言的真實性、完整性及立場等,不負任何法律責任。而一切留言之言論只代表留言者個人意 見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。香港討論區有權刪除任何留言及拒絕任何人士上載留言 (刪除前或不會作事先警告及通知 ), 同時亦有不刪除留言的權利,如有任何爭議,管理員擁有最終的詮釋權 。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright©2003- Discuss.com.hk Limited. All Rights Reserved.
版權所有,不得轉載。