35/女癌症復發，覺得繼續落去會連累男朋友，想分手，希望佢幸福
#1
發表於 2018-4-25 11:02 AM
[按此打開]
[隱藏]
我35歲，男朋友細我9年，拍拖4年，我哋其實好夾，相處得好開心，屋企人、朋友都接受，本來諗住今年年尾結婚，不過我年頭確診癌症復發。
佢對我好好，成日都話等我做完治療好啲就去結婚。但係其實我對佢好內疚。我第一次癌病嘅時候未識佢，醫好咗之後先識，我冇特別話畀佢聽我有過癌病，淨係講咗我未必生到小朋友，佢話同得我一齊都唔諗住生（因為我大佢9年，怕我辛苦）。
本來舊年係第六年，我呢種癌病兩年內復發機會好高，醫生都話過咗五年再嚟嘅其實真係唔多。所以舊年佢同我求婚，我都終於應承咗佢，諗住今年年尾結婚。不過要嚟嘅始終會嚟，舊年年尾開始覺得唔妥，今年二月就確診復發，又要化療。
其實開頭都冇諗咁多，淨係諗住唔結婚住啦。不過我二月尾到而家做咗三次化療，情況唔係幾好。我又上網搵過好多資料，其實第二次復發就算叫做醫得返好，都好大機會有第三次復發，基本上係等於醫唔好嘅，即係最多只係延長壽命。
所以呢幾日開始覺得想同佢分手。佢後生過我好多，我唔想留咗佢喺我身邊，阻住咗佢幸福。雖然男人30、40歲都唔怕老，但係既然同我一齊都唔會有好結果，我希望佢可以幸福。唉，不過打到呢度我已經流晒眼淚，好唔捨得。一方面好慶幸佢知道我嘅病都冇掉低我，另一方面對佢好愧疚。
我有同佢講過覺得好對佢唔住，話過不如分開，叫佢搬返屋企，不過佢唔肯。但係其實我唔知佢係唔知道，定係唔肯接受事實，就係我呢個病唔會好得返。
有冇巴打絲打可以畀啲意見？巴打，如果你哋係我男朋友，你哋會點諗？
