註冊 登入



打印

漂亮地離場~近況更新

漂亮地離場~近況更新 E-mail 此主題給朋友

[隱藏]
漂亮地離場~近況更新

[隱藏]
冇一段婚姻可以百分百天長地久. 只不過當劇情進展到無法補救時, 男又好, 女又好, 盡可能漂亮地離場.

我同前夫16歲識, 18歲結婚, 27歲生左一對孖仔. 對左一個人廿七年, 點可能唔察覺有問題? 有一次朝早六點幾, 全屋人都起哂身預備番工, 前夫唔記得帶電話, 佢手機響, 個女人喂左一聲, 呆左一下, 話:對唔住, 打錯. 跟住馬上收線. 我拎住個電話同我兩個仔講:女人黎!! 咁早有女人打黎, 你地話咩事? 如果我冇估錯, 佢每朝去車個女人番工. 當時兩個仔都知咩事. 我馬上跟個來電號碼打番過去, 我同個女人講:其實你冇打錯, 係有人唔記得帶電話. 個女人嚇到口都窒埋講:哦哦哦...咁我打佢公司啦...果晚問前夫咁早點解有女人打黎, 佢話係佢的客, 我應佢: 嘩..你的客真勤力, 六點幾MORNING CALL. 之後每次出去食野, 佢去泊車, 我地搵到位後打比佢, 個電話永遠打唔通, 番屋企佢都係先車我地到樓下, 再去泊車, 有時想食糖水, 打比佢叫佢買, 永遠打唔到, 到打得通時, 個響聲已經到門口.

婚姻去到末期時, 我椎間盆突出入院, 醫生話開刀50%得, 另外個50%係可能癱, 可能雙腳無力, 可能手術做唔到..等等. 我家人帶我上大陸推拿, 短程兩日一夜當旅行一家四口一齊上, 全程悶悶不樂, 連家人都問佢咩事, 我仲幫佢解畫, 佢好忙好累...個情況就係你知我知而扮唔知, 我又知你知我知係度扮唔知.

果一年所有不幸既事都發生, 自己腰痛到由全職轉半職, 媽咪糖尿開刀切左一隻腳, 截肢後, 由於全身麻痺傷左腦神經, 令本來既老人痴呆更加嚴重. 經常失控. 電話一到, 我就由屯門跑出去油塘睇佢. 係我最需要支持既時候, 果陣仲係我老公既佢同我講佢失戀, 果個女人要同佢分手. 我真人朋友每次聽到呢度, 都覺得我應該斬佢, 或者拿滾油淋佢. 我冇... 正如我標題, 漂亮地離場

果一晚, 我幫佢補緊襪, 佢成日都話我補過既襪都著好耐, 佢走埋黎一手搶左對襪, 同我講:唔好補啦, 補唔到架啦. 我一聽已經知道劇情進展到攤牌啦. 佢話我係一個好聰明既蠢女人, 所有野我一早估中哂, 佢同果個女人已經一齊兩年, 近期有一個索K既男人追果個女人, 果個女人同佢講, 以佢條件好難有人追, 依家真係有當標尾會啦, 所以主動同我前夫提出分手, 就係咁, 我前夫覺得佢自己失戀.

我聽完佢果篇獨白, 行出房敲一敲兩個仔房門, 同兩個仔講, 佢認左啦, 個女人已經兩年多. 我兩個仔好鎮定, 睇住我拿左個紅白藍出黎幫佢執野, 我一路執一路講, 你唔認我地當然扮誤會. 但認左, 呢個家就好難容得落你.  就係咁, 我幫佢執好衫褲送佢一程. 兩個仔冇幫過佢半句, 我地一齊送佢出門口, 冇打打罵罵, 氣氛和平. 佢搬左番貨櫃場瞓左一星期, 跟住同我的阿哥講何等後悔, 佢仲想要呢個家. 我地三母子商量過後, 覺得比多一次機會佢, 於是大孖就去接佢番黎, 當晚佢買左紮花, 當住兩個仔面前跪低, 聲淚俱下認錯. 點知半年唔夠, 佢仲要叫埋個女人入佢公司做, 佢公司個有個同事係我朋友, 我朋友話佢日日車住個女人出去LUNCH, 我幫佢帶飯, 就日日拎番黎, 焗到臭哂, 話老細請佢食LUNCH. 問佢既時候, 佢話佢都估唔到會一齊番. 本來只想介始份工比佢....
果次, 我叫兩個仔幫手, 用左幾個大紅白藍裝哂佢所有冬夏既衫, 連埋電腦拆哂出黎, CALL車送哂番我奶奶屋企. 跟住打比佢同佢講所有野執好哂, 幫埋你搬番奶奶度. 手續我會去搞, 你到時請假簽個名, 唔好再花時間玩分居, 事實我地有名冇實左好多年.離婚手續好簡單方便, 上家事法庭簽個名, 填份表, 等半年就搞掂, 所有野都成為過去.

一段長達廿七年既婚姻唔使一年既手續就終結, 我唔會滿足果個女人既虛榮感同佢爭男人, 更加唔會比前夫覺得佢自己有幾難能可貴, 完左就完左, 輸左27年婚姻, 唔好連風度都當贈品一齊輸埋出去.

我一直冇機會同果個女人講聲多謝, 多謝佢勾引我老公, 令我決心結束呢段婚姻. 更令我有機會同依家既老公一齊. 我離左婚之後仲有去探我EX奶奶, 仲有買野比佢, 天氣凍, 我同往年一樣, 買的餸拎上去, 等佢唔使落樓, 佢成日對住我喊. 叫我番去. 我做咁多野係要比孖仔明白, 對老人家一份尊重同關心. 我依家個老公好好, 好體諒, 佢都贊成我多睇老人家. 唔會多心.

大家網友, 我都希望大家婚姻可以愉快, 但如果真係不幸未如人意, 都要克制, 忍耐, 漂亮地離場.


近況更新:
不經不覺今年已經係結婚5週年,第二段婚姻令我好深徹感受到咩叫越簡單越快樂,年過50, 實行減法人生:
伴侶:
減掉不必要期望,每個人都係獨立個體,伴侶唔係度身為你而生.總會有唔同想法,開心話題不妨多講,觸及底線少說.過日子少批鬥,冇好處.年輕時候我唔明,觸礁.依家明白左,第二段婚姻已踏入5週年,大家恩愛依然,相敬如賓.
朋友:
減掉不必要的應酬,酒肉朋友更加唔使留,真正知己一個就夠,今時今日邊個得閒聽你講心路歷程.幾十歲人唔好扮天真.
生活:
簡簡單單就非常好,無謂野少買,屋企空間大好多,衣著乾淨舒服,衣櫃自然瘦身成功!
親人:
唔係每個親人都可以令你如沐春風,總會有的頂心樁好似7ELEVEN咁係左近,避得就避.無需得罪,以前我覺得第一任奶奶難搞,到了第二任先知天外有天,一山還有一山高.見招拆招.少的接觸一的會令自己超級起火既張三,李四.
子女:
孖仔已經27歲,除左冇女朋友令我擔心之後,成長左好多.依家前夫同小三搬左去附近住,經常有照顧佢地.我番香港,依然同前夫飲茶食飯.幾年前係新加坡跌親腳,骨折.前夫仲送我機場,幫我手上落行李.佢唔再係我老公,但至少都仲係親人.能夠心平氣和相處真好.何必撕心裂肺

年紀大,減走的會令你非常唔高興既人和事,對自己好的.令自己生活愉快的.冇必要同自己過唔去.

~互勉之~

[ 本帖最後由 凍啡少甜 於 2018-3-13 09:34 AM 編輯 ]



實用相關搜尋: 朋友 伴侶 失戀 離婚 結婚 瘦身 結婚
你真係好叻!佩服!
希望你每天也過得很快樂







你咁好咁叻,好少女人可以做到…





祝福!


實用相關搜尋: 祝福
Photobucket
[隱藏]
你兩個仔都好懂事!祝幸福快樂!


實用相關搜尋: 幸福

回覆 引用 TOP

一直都覺得師姐形爆






回覆 引用 TOP

要衰好多次,死而復生. 先得番黎既生活體驗.
一段婚姻要經營得好,真係好唔容易.我年紀大,衰得多.感受又會多的.
係度同大家分享下,希望後生夫妻,大家唔好樣樣睇得太重.有時兩公婆有意見不一,冇必要太執著去拗既.太認真咪輸囉.
過得自己過得人.想開心就一定要自己帶頭,凡事唔好太過計較.



熱門搜尋: interior design 鋁窗工程 按揭 女傭 洗碗 service apartments 通渠
引用:
原帖由 無懮 於 2018-3-13 10:45 AM 發表

你咁好咁叻,好少女人可以做到…
兩夫婦相處,同跟仔女相處一樣架咋,要輕輕鬆鬆,玩多的。我老公成日驚我係屋企悶,岩岩又whatsapp我,叫我試玩一隻荒島求生。我地平日的交流都係老朋友咁架






附件

Screenshot_2018-03-13-11-44-56-70.png (655.12 KB)

2018-3-13 11:49 AM

Screenshot_2018-03-13-11-44-56-70.png

Screenshot_2018-03-13-11-42-59-38.png (756.82 KB)

2018-3-13 11:49 AM

Screenshot_2018-03-13-11-42-59-38.png

被背叛原諒再被背叛繼而可以咁淡定真係唔容易師姐好野!

但想問下妳當時有無問妳前夫點解會有小三? 對妳有咩不滿? 定係只係j痕?

我: 過來人。到今時今日我都唔知衰咩!



熱門搜尋: 信用卡迎新禮品 按揭 旅遊保險 家居保險 人民幣定期
[隱藏]
祝福!


實用相關搜尋: 祝福

回覆 引用 TOP

佢話有拒絕過,但係個女人話只求同佢一齊,不求其他
佢自己親口講,個女人又肥又醜.後來連佢屋企人都鬧佢比鬼迷.
唉...男人都係貪新鮮,就算個個都鬧佢搵件扒,咁點都係新鮮嘛.佢依家同兩個仔講後悔啦,個女人又甩唔到



實用相關搜尋:
引用:
原帖由 凍啡少甜 於 2018-3-13 11:49 AM 發表



兩夫婦相處,同跟仔女相處一樣架咋,要輕輕鬆鬆,玩多的。我老公成日驚我係屋企悶,岩岩又whatsapp我,叫我試玩一隻荒島求生。我地平日的交流都係老朋友咁架
你老公好可愛,你一個嬲嬲公仔佢都俾個笑得好開心嘅公仔你…



實用相關搜尋: 朋友

回覆 引用 TOP

引用:
原帖由 凍啡少甜 於 2018-3-13 12:00 PM 發表

佢話有拒絕過,但係個女人話只求同佢一齊,不求其他
佢自己親口講,個女人又肥又醜.後來連佢屋企人都鬧佢比鬼迷.
唉...男人都係貪新鮮,就算個個都鬧佢搵件扒,咁點都係新鮮嘛.佢依家同兩個仔講後悔啦,個女人又甩唔到
我前夫嘅小三,係佢幾個朋友玩到甩唔到身,一個介紹一個,到佢,佢當人係寶…







引用:
原帖由 無懮 於 2018-3-13 12:07 PM 發表




我前夫嘅小三,係佢幾個朋友玩到甩唔到身,一個介紹一個,到佢,佢當人係寶…
吓?成班襟兄弟見面咪個個um住半邊咀笑?



實用相關搜尋: 朋友
[隱藏]
引用:
原帖由 zoe~berry 於 2018-3-13 12:11 PM 發表




吓?成班襟兄弟見面咪個個um住半邊咀笑?
係㗎,睇住我哋家散添…



 提示:支持鍵盤翻頁 ←左 右→
[按此隱藏 Google 建議的相符內容]





重要聲明:本討論區是以即時上載留言的方式運作,香港討論區對所有留言的真實性、完整性及立場等,不負任何法律責任。而一切留言之言論只代表留言者個人意 見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。香港討論區有權刪除任何留言及拒絕任何人士上載留言 (刪除前或不會作事先警告及通知 ), 同時亦有不刪除留言的權利,如有任何爭議,管理員擁有最終的詮釋權 。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright©2003- Discuss.com.hk Limited. All Right Reserved.
版權所有,不得轉載。