之前都呻過我屋企人對阿哥女朋友仲好過對我, Disney+預佢都唔預我, 佢想整南瓜燈籠又要全家人一齊食南瓜
阿哥女朋友而家仲搬埋入嚟住, 日日廁所要讓佢用完我先可以用, 話我沖完涼地下啲水唔抹驚跣親佢
咁大個人唔識睇吓個地濕唔濕先踩入去咩...... 何況之前畀阿爸話過我之後我次次沖完涼都有拖返乾個地先出嚟
而家晚晚要等佢沖完涼我先可以去沖涼, 女人沖涼真唔知喺入面玩咩, 沖個涼可以成一個鐘以上
有時佢同阿哥夜返, 阿媽都唔畀我入去沖涼先!!!!! 話一定要等佢未來新抱沖完我先可以沖......
等等吓我眼瞓到連涼都冇沖就瞓著咗, 第二朝又話我污糟唔沖完就去瞓......
去食飯以前4位可以一齊坐卡位, 而家有時出去食晚飯5位我就要同其他人搭枱, 連阿爸都唔會同我一齊坐
仲話我咁大個人一個人食飯都搞得掂啦......
仲有好多嘢, 我買完零食係畀大家一齊食, 但係而家我阿爸買完零食會特別同我講叫我唔準食, 要留返畀阿哥女朋友食.....
我先係你親生㗎, 點解而家好似我先係外人咁

同班親戚食團年飯，我表哥係奉子承婚佢老婆睇落同我差唔多大，最多都係26 27歲
佢老婆生完之後極速瘦身，講真我都有啲羨慕佢，話晒我未生個肚腩都大過佢生完…
聽阿媽講佢生完之後辭咗職但喺屋企又唔湊仔，請咗個工人姐姐返嚟，再叫埋個奶奶即係我姑姐幫手做家務
出嚟食飯，佢帶埋工人姐姐出嚟，佢個仔都可以梅吓梅吓咁食嘢，但係食到周圍都係
得個工人姐姐睇住佢，但係工人始終唔會鬧小朋友又唔會阻止佢，話晒小朋友都係佢老細呀嘛
因為我坐喺小朋友隔籬，佢食食吓飯走嚟扯我頭髮，真係人仔細細點估到佢咁鬼大力呀！
叫佢放手又好似唔識聽咁，唯有我用啲力拉開佢隻手，點知佢個仔冇啦啦大喊，搞到好似係我唔啱咁
表嫂鬧返我唔畀佢個仔扯頭髮，佢個仔都係想同我玩吓，仲問返我點解要咁大力整佢個仔
大姐，而家係你個仔整痛我，咁都叫玩吓？我又扯吓你頭髮然後同你講係玩吓呀
真係勁委屈，而家小朋友真係大晒？

我發現我屋企人真係好大愛，咩都鍾意同人分享
之前整嘢食又要分畀親戚鄰居食，而家突然間開始搶必理痛
有個親戚話佢周街買唔到藥，打畀老豆講到自己好慘好慘
你真係中咗我哋拎畀你都唔係問題，但係你家下冇事幹做咩要問人拎藥？
中嗰陣佢都話自己冇食藥啦，而家好返又話要藥看門口？咁搞笑㗎咩？
未開始搶必理痛之前我有日頭痛買咗一盒，仲要冇諗過又會搶藥只係買咗10粒裝
食完4粒都係得返6粒，自己屋企有4個人計埋阿哥女朋友有5個人，真係買唔到藥有咩頭暈身興嗰陣6粒點樣分畀5個人？
幫人唔係問題，但係自己都要夠用先有得幫㗎嘛，一個電話打嚟賣慘就話分幾粒畀人？
仲要問我而家邊度仲有得買藥，我老豆如果喺70年代一定係人人為我 我為人人嘅鄰居英雄

利申：唔識波

國家隊教練唔一定要用返同一個國籍？前日睇韓國嗰場見到個教練係外國人樣，想問吓點解教練可以係其他國籍嘅人？