而家港澳門開左關, 唔知有無人有興趣過黎跑場比賽順便玩返兩日?
 
https://www.macao10k.com/zh/
 
日程大致係咁:
現在開始: 可前往上述網站先註冊帳號
2月18日 09:00: 十公里項目報名
2月19日 09:00: 歡樂跑項目報名
3月15-18日: 領取號碼布
3月19日清晨: 比賽日

https://tripplanner.macaotourism.gov.mo/
 
原來澳門旅遊局搞左壇咁既野,
輸入日期長度可以幫你PLAN行程.
不過初步睇似乎限制係無包括啲賭場酒店,
可能係官方產物唔太方便幫特定博企賣廣告.

燈塔算係澳門其中一個重要景點, 舉例說澳門現在廣泛流通嘅硬幣中有兩個面額係以景點為主題, 除左五蚊銀(12角形)係以大三巴為題外, 另外就係以燈塔為題嘅一蚊銀了, 而早年TVB以澳門為題電視劇"十月初五的月光"主題曲MV中亦係以燈塔燈光為背景, 可想而知佢對澳門嘅代表性.
燈塔位於"東望洋炮台"之內, 炮台內仲有一個小型教堂, 與及"掛風球"嘅旗桿及風球存放區(目前有訊號時仍會掛上去的).

 
上山方法: 簡單啲可以分兩個階段, 因為半山位置有一條環山跑步徑(地厘古工程師馬路), 既然叫得做"環山"無論你用乜野方法上山, 都一定要先路過果條環山徑 (好多人跑步同做運動, 好明顯的), 方法有好幾種:
 - 由皇都酒店, 沿旁邊斜路上去, 一路人望高處就可以到達跑步徑起點;
 - 同樣由皇都酒店旁邊斜路上, 但想慳力行少啲斜路的話, 去到"金融管理局"會有一個行人隧道入口, 進入"焯公亭步行系統", 根據隧道指示尋找升降機上"松山跑步徑"出口
 - 由新口岸一帶(東方拱門, 俗稱生鏽鐵附近), 中聯辦建築物後方, 會有一座電梯上山, 亦可以進入"焯公亭步行系統"
 - "松山行人隧道"內有一組升降機亦可登上跑步徑, 隧道有兩邊出入口, 一邊在二龍喉公園旁(靠近行車隧道入口, 公園內不能直達)
 - "松山行人隧道"另一組出入口位於新口岸區, "皇家金堡酒店"對面

澳門地方好細, 例如下圖就係google map以相同比例下對照香港油尖旺區, 又或者如果有睇慣賽車的話, 紅色線就係賽車跑道實際位置, 又或者大家黎慣新馬路果條直路(其實正式黎講較闊嘅一部係"殷皇子馬路"), 就係圖中綠色線.
澳門目前無細分嘅行政分區, 例如選舉時都係以單一選區進行, 選民即使搬屋唔更新地址, 後果都只係自己唔方便要前往較遠票站投票而已, 但就完全唔駛擔心被指控"種票"而惹官非.
但澳葡時代嘅澳門係有分行政區的, "澳門"下設兩個市 - "澳門市"及"海島市", 當中"澳門市"係指澳門半島, 而"海島市"就係氹仔及路環島. 有一點有趣嘅係, 香港回歸時有個升降旗儀式, 係英國與港英旗降下後中國及香港區旗升起的, 澳門回歸亦有類似儀式, 但因為"澳門"本身並無旗幟, 所以就用左"澳門市"嘅旗黎代替, 但咁樣一來係有一個小問題的, 是否代表"海島市"部份並無回歸到? 但當然呢點只係象徵意義, 實際上按中葡聯合聲明, 係澳門半島, 氹仔及路環島都一併交還中方的.
而澳葡時代另一個分區法就係按照天主教堂區去分(畢竟葡國係天主教國家), 澳門半島分成五大堂區, 風順堂區(聖老楞座教堂), 大堂區(主教座堂), 望德堂區, 花王堂區(聖安多尼教堂)及花地瑪堂區, 回歸後似乎係唔想政治上被天主教牽住鼻子走, 呢種以堂區嘅分法亦逐漸淡化, 除此之外亦有坊間唔太流行嘅統計分區(人口普查用)及近年提出嘅規劃分區(分成18區, 坊間會取笑澳門咁細都學香港分18區咁多).
但其實另一個較易理解又符合現實嘅分法就係澳門半島簡單分成"北區"及"中南區", 大約係以附圖中藍線部份. 其實只要睇返黑白圖果個堂區分佈, 會發現其中四間堂區教堂(紅白點標示)都係集中中南部, 而且歷史都可追溯至十六七世紀, 好明顯早期澳門聚居點就係以該區為中心擴散開去. 而北區(5)只有一個堂區, 間教堂亦只係得約100年歷史, 明顯就係相對新嘅區了, 緣由就係約莫七八十年代, 大量新移民由內地湧入, 當時澳葡政府就於"北區"先後建立左一啲臨時及永久性住屋畀佢地. 但由於係以較低成本, 最高密度解決佢地最基本住屋需求, 所以居住條件唔係好理想. 所以以上述兩個概念擴散開去嘅聚居點就自然形成兩個區了, 之間大致係"提督馬路"及望廈山為分界 (圖中藍線), 而就旅客而言, 因為該區歷史短, 古跡自然亦唔多, 多數都係黎慣黎熟想"深度遊"先會去. 但由於近年澳門經濟起飛, 對住屋需求大增, 而"中南區"土地大多已用完/不可使用, 所以北區中例如筷子基或黑沙環(東北)亦有新土地起左啲會所設施較完善嘅"豪宅".
至於離島區發展, 本來氹仔島及路環島都係郊外地區, 互相之間有一條"路氹連貫公路"連線, 亦即係現時所謂"金光大道", 於澳葡時代末年將旁邊填海連結左兩個島, 後來回歸後開放賭權, 博企需要地起賭場/酒店/渡假村, 就主要係將果啲地批畀佢地了. 而氹仔島本身亦開發左一啲新興住宅區, 主要係for中產階級, 路環島就大致保持"不可都市化"原則, 但實際亦面臨"發展"嘅挑戰, 總會有人謀住啲地黎起高樓大廈.